圈中攝影發燒友任達華，今年喺書展推出第三本攝影集。佢話攝影集本身印咗1千本，o依家已經賣咗700本，出版商即刻印第二版。任達華指攝影集係介紹地道香港，而旅發局亦會用嚟去外國宣傳香港。

講到現時香港唔少人出街都做低頭族，任達華話：「所以希望大家可以睇吓呢本書，睇多啲風景呀，等大家可以放鬆眼球。好似以前坐電車睇風景拍拖， o依家好多人會瞓覺或者睇電話，我都明嘅，手機有好多功能，不過除咗睇電話，都應該要擔天望地，望多啲風景。攝影集最後一張相係影木棉花。因為木棉花開喺春天，想帶出無論世界點變，都希望大家心存春天。亦希望透過呢本攝影集，去多謝長者同自己媽咪，因為佢哋燃燒青春，先令到香港o依家咁好。」任達華亦都感激老友王敏德帶咗佢飛兩轉，拍攝離島海岸線面貌。

講到有冇限制囡囡Ella玩電話，任達華就話：「都有o架，不過佢都識分寸，所以我成日同老婆囡囡去旅行，放鬆心情。」