【Second Life】螞蟻銀行零產品 金管局禁面世（杜夫人）
蘋果日報 2020/08/23 12:13
銀行及金融
消息透露，螞蟻將會同電子錢包AlipayHK合作，特選AlipayHK用戶可經App進入螞蟻銀行「小程式」開戶。
螞蟻銀行手機應用程式無內容，傳遭金管局打回頭，要夥拍同系AlipayHK推新功能才有望過關。
金管局2019年先後批出8個虛擬銀行牌照，至今只有一半正式推出業務，反應兩極，匯立銀行開業首10日，吸客1萬，而Livi CEO喺中銀內部賣行廣告，吸客力都只係前者一半。
螞蟻銀行屬首批試業虛銀之一，同期試業嘅仲有天星銀行、匯立銀行，不過，螞蟻連人哋尾燈都望唔到，開業消息一直只聞樓梯響。
睇返市場情況，同行有1%活期Go、低至1.85%私人貸款、GoSave小巴、實體記賬卡、QR code支付方案加獎賞計劃。螞蟻銀行呢？個App完全無內容。
零服務、無綽頭都仲想出街？咁同試金管局條底線有咩分別？6月底一度盛傳螞蟻已進入最後直路，結果都係被金管局攔截，兼打回頭，零分重作。
真心，虛銀呢件事搞咗將近年半都未全數出街，唔只銀行上下無癮，監管當局更加顏面全失，好彩星洲因為疫情押後發出虛銀牌照，否則，有比較、有傷害。
可能係「恨鐵不成鋼」啩？金管局要求螞蟻再入沙盒。消息透露，螞蟻將會同電子錢包AlipayHK合作，特選AlipayHK用戶可經App進入螞蟻銀行「小程式」開戶，唔使經蘋果App store或者Google Play下載，首2萬存款活期息仲有2.5厘。（編者按：仍較天星銀行迎新優惠低1.1厘）。
大概金管局覺得「小程式」呢個功能非常創新，無論如何都「鼓勵」銀行盡早上架，就算推出日期遲過開業日期都無問題。
銀行方面當然覺得方案無懈可擊，對AlipayHK 超過200萬用戶口水直流，食到面嗰浸嘅話，今年KPI就肯定有望達標，加上，AlipayHK已經涵蓋衣食住行，已營造龐大生態圈，係一個超級生活平台，幫吓姊妹公司螞蟻銀行真係易如反掌，或者可以產生協同效應，助AlipayHK進一步「滲透」香港兼推高市佔率。
呢刻實在難以估算有幾多AlipayHK現有用戶想開多個螞蟻銀行戶口，至少這200萬人慣用手機，對科技不陌生，唔介意其中資背景，已經飲得杯落。
對於依然「企硬」拒用AlipayHK嘅小撮人嚟講，依然相信「免費，永遠最貴」，無必要奉上個人資料，秉持「中資虛銀不了」的心態，正如堅持「一定唔做全民檢測」的道理一樣。
杜夫人
-----------------------------
【全球樓行】 Dream House零距離
屬於香港人的移民攻略
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！