星期三下午出街，碰到公子A行去都爹利街，問佢所為何事，公子A話律敦治中心地下有一間名店，賣撚手家具，橫掂得閒，就行去睇吓有乜靚嘢。呢間家具舖係鍾楚紅老公MikeChu開嘅，喺啲優皮士界甚有名氣，照計都爹利街冇乜人流，平日好清靜，但MikeChu間舖開咗好多年，做得住，可見香港有銀士啲taste都幾高。

後來聽見珠寶L話：「MikeChu間舖就快搬過去對面嘅鑽石商會大廈二樓，四千平方呎，做舖位算幾相宜。聽講現在中環商廈不斷減租，但律敦治中心企硬，唔肯減租，老租客都冇得傾，所以MikeChu冇法子唔搬啦。」
左丁山亦有朋友在律敦治中心租寫字樓，據呢位朋友講，律敦治中心喺九九年受金融風暴影響，減過一次租，但點都唔肯減管理費，因為呢間大廈由仲量行管理，確係管得好乾淨企理，服務態度亦好，但係今時今日嘅通縮年代，仲量行管理費收七個一（每平方呎），差唔多係貴王之王，啲租客點頂呀？一般中環大廈嘅管理費由每呎三個半至五個零，律敦治中心由仲量行管，收七個一，唔通係奇貨可居，有得選擇嘅租客，唔搬就笨，你估嫌錢腥咩。
律敦治中心嘅大業主係幾十年前印裔首富鄧律敦治嘅後人，鄧律敦治女婿施羅夫（Shroff）係一等好人，亦係一流馬主，喺馬圈嘅人緣好到加零一。