特首林鄭月娥上場後冇耐，即刻成立土地供應專家小組，檢視土地供應來源，未來一段日子會有「大辯論」。睇返搵地方向，唔少人將注意力聚焦開發郊野公園及維港以外填海等方向，但有地產界高人話，小組成員名單內藏玄機，似乎發展荒置農地先係林鄭最想打嘅主意。

睇返小組成員組成，大型地產商及商會代表欠奉，諷刺係揸住最多地嘅卻係地產商；講到現成「供應」嘞喎，佢哋先係「真‧專家」喎！最終影都唔見，有地產界人士話顯然係「悉心」安排，皆因若然有地產商在內，任何建議都會被指官商勾結；假若一席都冇，而最後係由小組「專家」建議政府收回農地或公私營合作開發農地，咁就可以避過勾結之嫌。

呢位地產界人士話，可以預計搞郊野公園同填海嘅爭議性極大，就算專家小組建議，政府要推行亦較難，反而發展荒置農地，只要冇農耕受影響，推行阻力自然較少，尤其林鄭絕非煲呔、亦唔係689，畀人感覺同地產商冇咁親近，落實機會肯定較前兩任特首更高。

至於對地產商嚟講，此舉是好是壞？似乎都要睇下政府開乜價同地產商換農地嘞。