馮德倫、鍾欣桐（阿嬌）、張茜同黃浩然噚日喺葵芳宣傳電影《犀照》，同市民大玩遊戲，吸引二百幾個fans捧場，當中以阿嬌嘅fans最多；張茜就着格仔恤衫，隱約透出紅bra，非常搶鏡。
阿嬌話今晚嘅首映禮請咗拍檔蔡卓妍（阿Sa）出席，原來阿Sa好怕睇鬼片，睇完會發噩夢，所以今次肯嚟，認真唔話得，佢會提醒阿Sa幾時要瞇埋眼。

舊愛不解溫柔

問阿嬌點樣過情人節，佢話要同阿Sa同謝霆鋒一齊拍廣告，所以會三人行度過。不過佢話唔太重視情人節，事關有個唔愉快經歷，阿嬌話：「曾經試過同個日籍男朋友喺情人節去尖東，但佢遲到，我覺得好凍，點知佢着件短袖衫嚟，原來件褸放咗入佢個袋度，冇攞嚟畀我着，加上佢送嘅禮物只係三支玻璃花連花樽，太實際喇！之後隔冇耐，大家分咗手，自此都唔太重視情人節。」
此外，馮德倫喺戲中有場同阿嬌嘅錫面戲，但最終被刪剪，但馮德倫竟然唔知情，重反問記者乜嘢原因。記者問佢會唔會係英皇唔俾阿嬌嘅螢幕初吻曝光，馮德倫講笑話：「吓，要守到幾時呀？」