【認住個LOGO！】速龍警瘀爆以為亞視執笠 1.6萬Like變熱門Post
蘋果日報 2019/09/22 21:51
亞視速龍亞視永恆亞洲電視數碼媒體
亞視永恆！就算亞視免費電視牌照不獲續牌而於2016年4月2日熄機，但亞視其後以網上平台方式運作，翻生版亞視在2018年1月29日復播，連月來逆權運動，亞視都有派記者採訪，並於facebook直播。亞視又於上周五舉行新一屆亞姐面試，燕瘦環肥佳麗艷驚四座。
不過，無論亞視如何努力，仍有人以為已經「執咗」。今日有人就反對修訂《逃犯條例》到沙田發起「和你shop」行動，亞視派員採訪期間遇上速龍，速龍要求現場記者出示記者證，亞視記者於是向速龍出示證件，豈料速龍望一望證件後向該名記者說：「亞洲電視？執咗喇喎！」記者即時反駁說：「上網睇啦，而家直播緊呀，亞洲電視數碼媒體呀！」有人認為將事瘀過04年亞視經典「Happy Birthday to me」一事，當年亞視邀請意大利足球名門AC米蘭請席台慶，並在席間邀請生日的球星岩布仙尼在節目上唱生日歌為自己慶祝，岩布仙尼無奈在鏡頭前唱出「Happy Birthday to me」。
亞視將速龍瘀爆事件於FB開post：「記者同事之後話：『想睇上網就有得睇咖嘞（㗎喇）。』但速龍sir可能太忙，頭也不回走了。我哋會繼續努力，做好報道。」不少網民笑爆嘴，直指克警X爆，紛紛留言叫「亞視加油」和「亞視永恆」，又表示「亞視你要做好事實報道！俾多啲五毛睇真相！」、「ATV，機會嚟喇！而家係ATV贏大台嘅時機，香港人唔睇無綫，會唔會睇亞視就睇今次你哋點報道整場革命。」、「支持亞視死唔斷氣不屈不撓嘅精神，我哋香港嘅而家就要呢啲電視台」、「搞錯啊，亞視翻生咗咁耐都唔知」、「亞視永恆~執嗰個係你」、「大師兄返來了」、「如果而家嘅亞視無以前深紅嘅話，呢個時勢一定多人睇過CCTVB。」
不少網民直指亞視好睇過CCTVB，亞視亦不斷回應和答謝網民支持說：「我哋可以永恆，都係當所愛係你。大家可唔可以賞面『讚好/like』我哋個page呀？多謝支持」此post短短3小時旋即獲得1.6萬like，比起過往只有數百甚至是數十like，可能成為亞視翻生後最受歡迎的貼文。
速龍警見到亞視記者證，直指亞視已執笠。（FB截圖）
亞視在facebook分享趣聞，並留言多謝網民支持。（FB截圖）
網民留言表示亞視永恆。（FB截圖）
亞視變成網上版不乏大型活動，例如上周五就舉行過亞姐面試，準佳麗李婉晴就驚為天人。（資料圖片）