由吳鎮宇、張家輝、黃秋生及何超儀主演，杜琪峯執導嘅電影《放．逐》，古仔係講黃秋生佢哋幾個殺手奉命要追殺張家輝，最後張家輝死咗，遺孀何超儀要將佢火葬，導演杜琪峯為求效果逼真，竟然要用真火燒佢。
喺拍呢場戲嗰陣，杜琪峯嫌張家輝身上嘅火唔夠大，所以吩咐工作人員加多啲火酒，家輝話：「雖然我上半身已經包咗防火綿，但估唔到加入嘅火酒已經滲咗入內層嘅衫，當時我只係諗快啲拍完就算，加多啲都冇所謂，加上拍嗰陣要扮死唔郁得，根本唔知啲火有幾大，到我feel到啲火燒到最內層時，我都即時掙扎。」

叼雪茄海報被禁

其實當時全組工作人員都好緊張，一見唔對路即時飛撲上前救火，用咗成半分鐘先將火救熄，「小家輝」差啲遭殃。問杜琪峯點解要用真火拍攝，佢話：「用真火效果最好嘛！」家輝就話：「作為一個專業演員，我尊重同接受導演嘅決定，但始終覺得呢個方法好唔文明，因為現今科技發達，用電腦都可以做到呢個效果。」
《放．逐》嘅宣傳工作進行得如火如荼，不過其中一張成班男演員叼雪茄擺甫士嘅海報唔知係咪因為同禁煙運動有關，結果俾地鐵公司抽起。另外，黃秋生噚日以一身型仔打扮現身西班牙，出席Sitges國際影展宣傳《放．逐》，點知俾外國新聞社認錯咗佢係導演，認真離譜。