【生得就生】梁諾妍笑認與洪永城同居試婚兩個月:無謂嘥大家時間
洪永城健身室梁諾妍
今年32歲的梁諾妍(Inez),近日在ViuTV懸疑劇《歎息橋》中,飾演衛詩雅的好友。戲份不多,但以處女作來說,算是一個好開始。Model出身的Inez,既是演員又是主持,更加是健身教練和健身室老闆,不過在多重身份下,最讓人記得的,始終是「洪永城女友」的身份。
與洪永城(Tony) 拍拖年半的Inez,在訪問過程中,和其他女星最大分別是,提到身邊另一半時,她幾乎有問必答,不矯揉造作扭扭擰擰。分享和男友的小秘密時,說幾句便會附加爽朗笑聲。少了一份防範添了一分可愛,她透露二人為了爭取見面時間,剛開始同居試婚生活兩個月。「點解當初要兩個人試吓出嚟住?我諗係因為兩個都忙,嗰時就算喺香港,我哋真係忙到兩個禮拜都見唔到,咁覺得如果喺同一個空間之下,就算返到屋企都可以見吓面傾吓偈,溝通一下。佢(洪永城)冇乜幾何發脾氣,即使一齊住,到今日都冇嗌過交,係有時要提醒對方執好啲嘢,互相遷就一下。」
【10日冇洗碗】
前車可鑑,大台港姐馮盈盈早前和10A醫生男友正正因相見好同住難而分手,Inez反而覺得要先同居才令感情更昇華。「爹哋成日話相見好同住難,所以應該要試一試同居,睇吓大家夾唔夾,早啲知道合唔合得嚟,唔啱嘅就無謂嘥大家時間。」同居兩個月雙方仍處蜜月期,Inez透露間中會落廚煲定湯等男友返屋企。不過訪問期間,她卻被經理人踢爆,試過碗碟放在洗碗盆中,10日無清理。當場被點中「死穴」的Inez反應很大:「哎呀,你仲乜爆我啲嘢?」然後尷尷尬尬解釋:「其實(和男友)大家都鬥冇手尾,哈哈。因為嗰段時間太忙,返到屋企食個消夜就揼低晒啲碗,瞓都唔夠,仲邊有時間洗?最後我係請假去洗晒啲碗,仲執埋間屋,原來兩個鐘真係做唔晒咁多家務!」
【奉子成婚生得就生】
早前Inez被楊天命批有機會奉子成婚,Inez對結婚毫無頭緒,相反對生仔卻興致勃勃。「咁我哋都未傾到結婚,現階段大家覺得開心舒服。奉子成婚我係冇所謂,我好鍾意小朋友,心態係生得就生順其自然,不過呢件事唔係單方面嘅,因為唔知佢ready未。」提到洪永城曾讚女友優點,即使講兩個鐘都未講完,她笑說:「可能而家調番轉頭係講兩個鐘頭缺點!佢同我一齊,或者覺得我個人開心囉,唔係話自己冇情緒,但我喺朋友身邊,都係一個開心果嚟,嘻嘻哈哈,癲癲得得咁,可能因為咁,容易感染到其他人。」
【失去信任不如分手】
和洪永城拍拖,甜蜜時間居多,但其間亦試過出現漣漪,洪永城早前在大台劇被拍檔朱晨麗投訴「鹹豬手」,有傳他嬲爆不再與女方合作。身為洪永城女友的Inez,坦言事件發生後,身邊亦有口痕友說三道四,但Inez就從無過問男友是非。「我覺得拍得拖就要信任對方,我所了解嘅佢亦唔係呢種人,不過佢唔會特別解釋畀我聽,佢自己都話清者自清。其實兩個人喺埋一齊,如果冇咗信任,咁就唔需要繼續落去,所以我唔會質疑佢,佢咁大個人,自己都識handle呢樣嘢。」
【開健身室撞正社運疫情】
身為健身教練的Inez,多年來考獲多個運動教練牌,當中包括跑步教練、健身教練、伸展及營養牌以及全身肌肉訓練牌。去年中她膽粗粗在鰂魚涌開設健身中心,可惜時不我與,撞正社運和疫情。「其實都好傷吓,因為限聚令開唔到班,教練一堂幾十蚊喺網上教學,雖然入不敷支,但起碼間studio有番少少生意。開咗一年,撞到正一正,舊年5月尾開張,唔夠一個月就開始好多唔同運動,而家疫情打擊就更大。同業主講減租,最後都減咗3成。每個月都勉強交到(租),而家啲堂主力係一對一,用嗰啲錢去冚。裝修方面完全未cover到。」問到健身室重開會有何推廣策略?Inez說:「其實Tony都有幫手度吓啲marketing,諗住開番健身室後會搞啲promotion,會有折扣,鼓勵同學返嚟做運動。無論如何,起碼都要畀其他人知道有呢間studio存在先啦!」
武漢疫情雖然舒緩,但身為健身室老闆的Inez,在這段時間亦經常落手落腳抹健身器材。
Inez坦言健身室營運困難,現階段會構思多點推廣,留住舊客及吸納新客。
對於健身室的推廣,Inez表示亦有問男友洪永城意見。
身高5呎8吋的Inez,是運動和行山發燒友,身長腳長身材fit爆。
身為運動健將的她,透露和朋友行山時,邂逅洪永城。(IG圖片)
Inez和洪永城拍拖年半,早已融入男友的朋友圈中。 (IG圖片)
Inez不避嫌透露現和洪永城同居試婚。(IG圖片)
喜歡小朋友的Inez,講明有幾多生幾多。(IG圖片)
洪永城被指「鹹豬手」朱晨麗,Inez坦言會信任男友。(電視截圖)