區議會選舉仲有唔夠一年就舉行，參戰區選其中一個陣地就係業主立案法團，建制派選舉常見兩大招數有蛇齋餅糭同擸授權票，更高階嘅可以有四招，有意競逐連任屯門悅湖山莊法團主席嘅民建聯當區區議員張恒輝，近日就被指喺業主大會前收集已寫上佢大名嘅授權票，仲喺收集授權書限期當日以議辦同法團名義派手拉車，居民仲要早幾日登記住址先有得拎。

除咗上述兩招，靠「成功爭取」都可以加分㗎！張恒輝都幾有創意，佢喺月初派發嘅屋苑通訊中hardsell自己獲深圳市寶安區政協主席大駕光臨悅湖，仲話連中聯辦人員同全國政協委員都有出席，同佢一齊開會，對方仲讚佢管理妥善啊，認真巴閉！

年尾收爐突然開turbo，皆因悅湖星期四就舉行業主大會，改選法團主席同委員會，業主戴小姐同八方講，張恒輝一方面冷宣傳改選，一方面又好多小動作，包括安排18號提交授權票限期當日派發車仔，「我好質疑張當日會收埋授權票囉」。本來你有張良計，我有過牆梯，戴小姐同一班有心業主早前都想入信箱呼籲參與業主大會，但竟然被拒，管理處話得區議員、法團可以入，「好多朋友住其他屋苑都話派得」；出齊呢四招，張恒輝認真厲害。

攻勢不斷又唔畀人玩，有啲霸道咁噃！關注事件嘅民協當區社區主任、即有民協「張敬軒」之稱嘅黃虹銘（Ian）話，只要有關資訊係涉及屋苑管理問題，業主喺屋苑各座地下大堂派發資訊入其他業主嘅信箱並無不當，佢已經去信「溫提」管理處，可惜對方未有回音，佢話今次成班街坊都好着緊，覺得係公民社會嘅一種體現，都係件好事，希望街坊多多關注法團事務。

八方致電張恒輝想了解一下，但一聽到八方提到悅湖，佢就話開緊會唔得閒，急急收咗線。