蔡瀾、李漫芬同老公談成坤今日喺銅鑼灣出席火鍋店開幕，冒冷現身擔任剪綵嘉賓嘅蔡瀾，披上一條紅色披肩，篤住拐杖。據知佢係因為研究下點樣用同襯先至好睇，而唔係因為身體有事，大家可以放心。

至於懷孕25周嘅李漫芬，完成司儀工作後，老公即為佢披上外套保暖，十分細心。43歲嘅李漫芬透露呢胎係女，明年3月尾係預產期，佢笑謂可以買BB用品。問到改名未？佢話：「老公未識我嘅時候，已經諗定名，叫『談凱嵐』，我之前都諗咗叫『談在心』，0依家二揀一，我覺得同人講嘢要用心，會好窩心，好冧。」會唔會上育嬰班？李漫芬表示會上堂，亦會睇育嬰書，佢話：「BB喺肚裏面5個月開始就聽到聲，老公每日都會講『BB，爸爸返工喇！』，BB真係郁，我好感動。」

李漫芬希望可以順產，老公亦會陪入產房，談成坤話：「我會陪佢，難得嘅一刻。」李漫芬笑住話：「梗係要陪我，唔係喊死我，我好驚痛架，十級痛？都要經歷下。」不過談成坤表示仲諗緊會唔會親自為囡囡剪臍帶。

更多娛聞，喺晒《娛果》
http://fb.com/appledailyent