仲有唔夠半個月就係五一黃金周，作為市民，當然要小心H7N9可能隨着自由行急增，由內地蔓延至香港；作為股民，就梗係關心有乜概念股炒番轉。不過，今年情況與以往不同，由於金價突然暴跌，即使強國人繼續橫掃各大金舖，生意急增也未必能抵銷金價大瀉影響，毛利率或受壓，故珠寶股昨日只輕輕反彈。
零售股百麗（1880）及達芙妮（210）先後公佈首季同店銷售增長數據，因零售市道差炒復蘇無望，一致被大行唱淡。
不但珠寶、零售股冇乜鑊氣，酒店股都唔好得去邊。好似香格里拉（069），農曆新年炒高後，從3月初約18蚊高位，一直跌到𠵱家，唔見超過兩成。

預測PE高　盈利恐倒退

雖然在技術走勢上，RSI同STC都開始走出超賣區，昨日亦逆市反彈2.5%收14.06元。但根據彭博資料顯示，香格里拉現價PE為15.75倍，未來12個月預測PE為30.66倍，反映盈利有倒退迹象，現時有4間大行給予「持有」評級，3間「沽售」，僅2間「買入」。
睇埋公司由2011至2013年每次農曆新年展現的升浪，升幅一次比一次弱。加上現時內地經濟放緩，阿爺又肅貪，不論企業定係來港自由行，疏爽程度都大不如前。就算香格里拉出現反彈，都可能係曇花一現，值博率真係極低！

瑪姬兒