目擊好友跳海，最終搶救身亡，31歲姓李男子深感抱憾。據稱，李得悉好朋友阿傑唔開心，二話不說，應約與他飲酒聽心事，惟他突然跳海，實在始料不及。

李語帶哽咽地向警方說：「佢剝咗對鞋，即刻衝咗出去！」他曾經向附近市民求助，但對方愛莫能助：「我話幫我報警啦，佢哋都話冇電話。」

阿傑獲救時沒有反應、口吐白泡，李急得激動大嗌：「傑仔！」可惜阿傑送院搶救後證實不治。李稍後與朋友傾電話時愧疚地說：「我陪住佢，佢衝咗、跳咗落去(海中)，都唔知點交代。」