上周六全歐洲球場都好似電力不足，惟獨馬德里體育會個卡廸朗球場零舍光猛，仲好似有道白光全場射住阿古路㖭！呢位阿根廷𡃁仔梅開二度加兩個助攻，協助馬體會4:2擊敗巴塞隆拿，亦帶挈同市嘅皇家馬德里拉開榜首優勢至5分！講到皇馬，亦有羅賓奴光芒四射，兩個小將真係劏巴塞呢隻發瘟牛囉！
馬體會場波係近10年卡廸朗球場最精采嘅比賽，巴塞憑「細哨」30分鐘一個靚倒掛領先，點知8分鐘後阿古路就追平，佢右路連過艾比度同米列圖後，喺禁區頂偏右位置射門，個波射中佩奧爾隻腳反彈入網。42分鐘，呢位19歲新星再妙傳麥斯洛廸古斯領先2:1。
62分鐘，阿古路突入禁區，惹到騰騰震嘅佩奧爾出手一推獲判12碼，科倫射入成3:1；10分鐘後，阿古路搶甩佩奧爾腳下球，再扭過米列圖禁區邊彎入成4:1，奠定勝局（伊度奧74分鐘追番1粒）。以上精采片段喺求大俠腦海不斷重播，搞到要眼光光到天光。

羅賓奴梅開二度救皇馬

皇馬作客3:2擊敗維爾瓦，巴西球星羅賓奴同樣又扭又射，亦係個人梅開二度成「救世主」，結果協助球隊喺聯賽榜拋離巴塞5分之多。大家都知馬體會同皇馬唔啱牙，今次竟然間接幫對方一把，巴塞教練列卡特真係要嘆句：「天亡我也！」
鬼咩，連列卡特賽後自己都講：「個個都慢吞吞、渾渾噩噩，呢隊邊係巴塞嚟㗎？」其實主力美斯同廸高狀態一般，後備席又爆棚之下，新星杜斯山杜士同保贊做後備機會都唔多。所以，雖然巴塞好似把把刀都好利，不過好容易變咗殺牛用餐刀，殺雞用牛刀㗎！
巴塞發牛瘟，馬德里市雙星阿古路同羅賓奴輪流出刀，下下白刀子入紅刀子出，搞到列卡特、朗拿甸奴等人面都青埋，唔通今季又要俾皇馬騎住？