由韓國影帝宋康昊夥拍劉海鎮及柳俊烈主演嘅韓片《逆權司機》，上月2號喺韓國上映以來大受歡迎，電影日前打破2004年上映、由張東健及元斌主演嘅《太極旗飄揚：生死有情》嘅累積入場人次，打入韓國歷代票房嘅第10名，正狙擊2005年上映、李準基主演嘅《王的男人》嘅12,302,831入場人次紀錄，而《逆權司機》將於本月21號喺香港上映。

雖然電影喺韓國已經上映超過1個月，但入場人次依然冇停，截止今日《逆權司機》已經上映咗39日，繼續傳來好消息，電影於韓國時間今日下午1時突破1,200萬入場人次，據知電影突破1,200萬人次嘅速度，與2015年上映、由全智賢、李政宰等人主演嘅《復國者聯盟》突破1,200萬人次嘅速度係一樣，最終《復國者聯盟》共累積1,270萬人次入場，唔知《逆權司機》可唔可以Keep到個勢呢？