勇士喺美國時間星期一(香港時間星期二)再奪NBA總冠軍,球隊喺更衣室慶祝完一輪之後當然唔會冇下文,但佢哋冇好似舊年騎士咁樣去咗拉斯維加斯,而係去咗三藩市嘅夜店Harlot開party狂歡。勇士球員喺美國時間星期二凌晨12點半開始陸續到達Harlot,當中包括史堤芬居里同佢太太Ayesha、教練卡爾、祖蒙特格連同埋K湯遜等等,現場仲有Too Short、E-40、Terrell Owens同Blake Anderson等名人,而據美國八卦網站《TMZ》報道,勇士一行人總共飲咗超過80支香檳,包括兩支價值各15,000美金、專為2017年NBA總冠軍而設嘅6公升版香檳,當然有唔少香檳應該都係噴咗去嘅,佢哋淨係香檳都使咗15萬美金(約117萬港元),認真誇張。