韓流天王Rain同女星金泰希今年1月結婚，10月25號Rain喺Instagram宣佈喜訊，金泰希誕下千金，兩人升呢做父母。

而金泰希就專心湊女，至於Rain就努力搵奶粉錢，早前佢仲飛到台灣拍攝綜藝節目《團結才能火》，而喺噚日播出嘅一集中，Rain就談及同金泰希當日結婚時所舉行嘅婚禮。當日兩人嘅婚禮十分秘密，當日早上先通知親友到場，以避開傳媒採訪。而當日婚禮亦一切從簡，Rain指原本想畀老婆一個最好嘅婚禮，不過因為金泰希想喺教堂行禮，亦都唔想太盛大，所以最終只簡單舉行小型婚禮。

Rain直言當日行禮嘅西裝都係着以前着過嘅，就連婚紗照都冇影，即使婚禮當日亦冇聘請婚禮攝影師，最後要搵到賀嘉賓義務充當攝影師，並將所有賓客嘅照片製成婚禮影片。「愛妻號」Rain坦言原本乜都想為老婆做，亦預算搞華麗婚禮，笑言連銀行定期都要取消來辦婚禮，最後小型婚禮只花咗200萬韓圜(約14,360港元)左右。

Rain自爆同金泰希個性好似，又自爆為了出街食飯都用咗唔少時間調節，原來金泰希每日都要食屋企飯，所以出街食飯認真唔多。同時又爆老婆原本唔識飲咖啡，不過喺佢薰陶下先慢慢飲咖啡，又指金泰希酒量唔多好，喺佢指導下先慢慢飲多少少。

更多韓流，喺晒《娛果》
http://fb.com/appledailyent