現年40歲嘅韓國男星宋承憲，與29歲大陸女星劉亦菲前年合作電影《第三種愛情》後撻着，不過兩人拍拖兩年以嚟屢傳「分訊」，雖然宋承憲方面已多次否認，但依然傳聞不斷。而劉亦菲前日突然凌晨喺微博上載與愛貓合照，並附上一段發文直言「你就是謊言」，引發網民懷疑佢所指嘅就係宋承憲，兩人異國戀再受考驗。

劉亦菲前晚嘅貼文寫道：「不管你有多麽真誠，遇到懷疑你的人，你就是謊言。不管你有多麽單純，遇到複雜的人，你就是有心計。不管你有多麽的天真，遇到現實的人，你就是笑話。不管你多麽專業，遇到不懂的人，你就是空白。所以，不要太在乎別人對你的評價，你需要的只是做最好的自己，獨一無二的自己。」

有網民推測劉亦菲提及嘅就係男友宋承憲，所以又再次傳出「分訊」，但目前宋承憲及劉亦菲雙方都冇對分手一說作回應；亦有網民認為應該係新片《三生三世十里桃花》就快上映，估劉亦菲可能聽到外界嘅批評聲，感到有壓力先有感而發，同時亦唔少粉絲留言為偶像打氣「就是喜歡作自己的妳」、「永遠挺你」等。