賴慰玲(Winki)剛剛榮升做咗媽媽，囝囝嘅英文名Marat就由契爺鄭嘉穎幫手改，好多朋友都好踴躍咁去醫院探望Winki，好似嘉穎同女友陳凱琳、陳嘉寶、田蕊妮、孫慧雪、Super Girls成員吳嘉熙(Cheronna)等等。

Winki今日就喺社交網講述生BB時，經歷咗36小時搏鬥，最後都要剖腹。佢接受傅媒訪問時就講番呢場搏鬥，佢話：「首先我就穿水入去，入到去(醫院)都冇乜嘢嘅，買啲零食呀、生果呀...仲喺到享受吓生活吖嘛，但就開始越嚟越痛喇！程度越嚟越增加，越嚟越密，咁就開始緊張喇，因為穿水唔可以太耐嘛，最終都穿咗36個鐘，咁就冇計，最終要決定開刀。」

另外，Winki就話：「有好多朋友嚟探(我)啦，令到我最驚恐就係Cheronna（吳嘉熙）同埋思貝佢哋，一聽到BB有便便，就好興奮想換片，但係以佢哋嘅經驗嚟講，應該係雞手鴨腳，我同阿雪望到都一額汗嘅，但係...咁都好開心見到佢哋咁踴躍，如果佢哋遲啲上吓堂嘅話，都可以交俾佢哋照顧嘅。但係真好開心，有好多人祝福我哋囉，呢個係最大嘅喜樂嚟嘅！」

而爭住同Baby Marat換片嘅蔡思貝，亦喺微博度貼相，佢話：「Baby Marat, welcome to the world, a place full of wonders️ Looking forward to become one of the 煩aunties in your life(Marat bb，歡迎來到世界， 一個充滿奇妙的世界。期待成為你生命中的其中一位煩姨姨。)」

更多娛聞，喺晒《娛果》
http://fb.com/appledailyent