當年今日
關於我們

儀征做火車頭
股路縱橫:上石化急起直追

蘋果日報 2004/08/06 00:00


一路睇好後市,諗住立秋(嚟緊個禮拜六)過後,個市就會出現突破,但估唔到好友噚日突然發難,一挾上去,恒指最高衝上12518,尾市都守得穩喺高位,收12491,大升211點;期指重勁,急升284點,高收12475,低水大幅收窄到只有16點,計番滙控(005)同恒生(011)除息嘅因素,期指實際上已高水幾十點。
恒指噚日升破近半個月來的幾個高位,同埋上番10日線(12304)之上,而50日線(12172)預計下個禮拜亦會衝破100日線(12215),確認中期升勢,唔排除大市在12500水平會稍作整固,然後再破位而上,第一個目標係13000,中線(約11月)可見13500至14000。
國企股亦急升,以石化類表現較突出,衝閘而出係儀征化纖(1033),一衝破1.50元嘅阻力,就揚長而上,結果高收1.61元,大升0.15元,升幅10.2%。上個月底,筆者話儀征沽壓好重,俾「波仔」㩒足成個禮拜,果然大戶完成部署,一舉衝破阻力就有作為。

升勢有成交配合
大行出報告,話內地低估咗對聚酯嘅需求,同時又高估咗供應,形成儀征股價大大偏低。大行估計儀征04年(12月年結)盈利可上升至5億元人民幣,每股盈利0.115港元,目標價係2.55元。
儀征若衝上2字頭,則其他石化股要升幾多?
就講隻上海石化(338),噚日收2.85元,只升得2.7%,在儀征同吉林化工(368)走勢都出現突破後,上石化顯得大落後,𠵱家上車,有機會賺得更多。
上石化今年首季已獲利7.36億元人民幣,升1.4倍,已超過03年盈利的半數,保守估計全年獲利24億元人民幣,每股盈利0.31港元,預測PE13倍(重低過過去6年平均數24倍好多),股價已可升上4字頭。
上石化歷時3個多月的大圓底收集已完成,噚日一舉而重上10日、20日同100日線之上,且成交4330萬股,大增2.8倍,有動力配合,中期升勢確認,短期在上月中高位3元水平會有阻力,以大圓底形態來衡量,中線可向4月中高位4元推進。
郭兆誠