友人過年趕及買樓做業主，但不知是否應該恭喜他，事關友人購入的物業破了屋苑呎價歷史新高，豈料轉頭政府又出辣招！可能最要恭喜的其實是那賣樓的業主。不過我勸友人不用擔心，現在市區兩房單位竟可動輒索價五、六百萬，首期四成即二百多萬才上到車，全因在這「畸形世代」，錢已不再值錢。除非業主唔減價賣樓要罰食十斤辣椒，否則任何「辣招」也不會令樓價大跌，好快又會升番！

睇英超月費勢再加

錢不值錢，足球界何嘗不是畸形？英超最新三季轉播費成交價逾五十億鎊（約六百億港元），咁多錢買三季轉播權？我想像不到平均每場一千萬鎊的轉播成本如何有得賺。
雖然很多分析指在商言商，有此高價是因為有利可圖，例如《天空電視》（圖）既可吸引新的收費電視客戶，再加上綑綁式推銷寬頻、手機等業務，但最終月費肯定要加，普羅大眾最後都要蝕底。
既然錢已不再值錢，咁用錢出糧嘅老闆會否加人工？相反，返工有糧出都唔易！香港有《亞視》要求員工份糧半個月、半個月咁「袋住先」；意甲就有昔日勁旅帕爾馬無錢出糧畀保安，搞到主場比賽要「hold住先」、只可作客「踢住先」；計我話邊個搞到打工仔無糧出嘅，就應該「打鑊先」！
在錢不值錢的世代，人就要出賣更多時間、勞力、尊嚴去換取更多的錢，才夠交貴租、買貴嘢。錢唔值錢，人的價值只會更賤。
方栢翹
now足球評述員