今次(27日)快活谷夜戰，用全闊A跑道角逐，賽績顯示短途利內檔前置馬，中長途則有得追。論牌面潘頓座騎實力認真強，有機會連場報捷。馬房方面，蘇保羅展開了攻勢，相信會持續；蔡約翰、羅富全及徐雨石近期成績好，可繼續跟進。

第四場四班1000米，賀賢馬房的「慣勝積極」今季才派遣上陣，只跑了三仗，睇操練部署，可能馬匹體質較弱，故唔密跑，操練亦循序漸進，不給予壓力。

上仗「慣勝積極」出戰騎師賽，跟前仗相隔約個半月，體重上升，結果在布文出色發揮下，負於「和平開心」得亞軍。今次相隔三星期再跑，跌12磅幅度唔大，喜見馬身仍夠壯，埋門潘頓過檔拍跳，以勁勢壓倒對手，表現甚出色，弱馬難得狀態越戰越勇，排三檔是坐位望贏之選。

同場「威先生」今仗落四班報跑首本路程，狀態循序攀升，配羅理雅負死磅唔多，排外檔但夠快，應是出擊目標。「鑽得勁」勝後唔心急再跑，相隔兩個月才上陣，埋門試閘輕鬆取勝，走規續有改善。「和平開心」剛戰取勝過程都幾吃力，幸好體重不跌反升，慢試依然精神奕奕，用潘明輝減磅好跑，可爭三甲。「喜菜」、「精算八方」及「霽月高風」都是邊線馬。