無綫《勁歌金曲》前晚在將軍澳電視廣播城連做兩集,一集現場直播,一集錄影,監製陳競游表示因為下周有港姐決賽及奧運節目,所以要讓路,不過錄影的一集亦是當直播來做,不能NG。
「病咗唔好獻醜」
直播的一集由容祖兒擔任嘉賓主持,歌手有梁靜茹和台灣組合Energy。祖兒首次做主持,竟將師弟Boy'Z的歌曲《眼紅館》講成《紅眼館》,她說:「連自己友嘅歌都搞錯,真係抵死。我出名黐脷筋,所以好緊張。我鍾意直播,不過病就咪出席,會出醜㗎!」
而錄影的一集,本由陳慧琳任嘉賓主持,但因她病了,所以臨時由關心妍頂上,譚詠麟和許志安則做嘉賓。即將主持無綫奧運的許志安,日前往欣賞舊愛鄭秀文(Sammi)的尾場演唱會,有傳他坐在Sammi父母旁,對此他說:「我有去睇,但冇人見到啫!」有指他與Sammi每逢出碟或開騷便借緋聞宣傳,安仔說:「成日都有嘢做㗎,廣告、電影或者出碟,我隻碟只錄咗五隻歌,未知幾時出。」
樂壇有救感安慰
譚詠麟則大讚關心妍唱功好,並認為現時《勁歌》的形式令樂壇有救,他說:「香港嘅歌星以後唔使再俾人笑唔識唱live,亦可以畀啲唱得之人表演嘅機會。」
採訪:卓美娟 攝影:陳慧安