華華他日唔做傳媒，應該仲有出路，就係睇吓有冇富豪搵華華幫佢寫自傳！好似恒大（3333）主席許家印（圖），就搵咗位記者行家幫佢寫《恒大傳奇》，據講呢位記者跟咗恒大新聞成十年，所以對恒大好熟悉。
本書超過200頁，其中講到今年中超開幕式主題曲《崛起》，原來係由許家印填詞，作曲係小柯，08年京奧倒數100天主題曲《北京歡迎你》就係出自小柯手筆。首《崛起》由小柯同許家印逐字逐句修改，足足成個月先搞掂。
本書出咗半個月，總共印咗8萬本，除咗恒大員工一人一本，總共3萬本，另有5萬本對外銷售。