今日阿Sa（蔡卓妍）、郭富城、倪晨曦等喺尖沙嘴出席YSL Beauty Club香港站年度派對。

阿Sa身穿一身紅色連身裙到場，不過因為場地太大風，竟然吹起咗阿Sa條裙令佢差啲走光，喺接受訪問時問到阿Sa有冇試過被風吹到走光？阿Sa就笑住話：「冇試過呀，因為我私底下好少著裙出街，如果著裙應該要我心情超級好。」咁拍咗拖之後有冇著多咗呀？阿Sa就話：「都係差唔多啦，因為平時我都好粗魯，好少坦胸露臂，我係打底王嚟，有咩都打定底，所以如果有咩疑似走光嘅話，都係打底褲嚟㗎啫。」喺男友面前都係咁粗魯？阿Sa表示：「我唔知呀，都係做返平時嘅自己。」

講到梁浸浸同Yumiko一齊去拍真人騷，又有人話Yumiko俾梁浸浸玩得太多電話，阿Sa就話：「我未得閒睇呀，電話嗰啲都冇辦法啦，小朋友個個都係咁，唔俾手機呀iPad嗰啲就會好失控，有朋友帶啲仔女出嚟，初初都話唔俾佢哋玩，但係去到最尾都要俾，見佢哋都冇晒符。」咁你自己打算幾時先做家長？阿Sa聽到就即時「紅都面晒」話：「突然問呢啲嘢，係有就有㗎喇，呢啲係上天賜嘅禮物，唔係想要就有，隨緣啦。」咁會唔會有咗BB先至結婚？阿Sa就話：「最好就一步步嚟，不過唔好俾壓力我啦，我好chill㗎嘛，阿爸阿媽都冇俾壓力我。」