當年今日
關於我們

隔牆有耳:李慧琼兩會亂噏
「中港共同抗擊SARS」 - 李八方

蘋果日報 2019/03/12 02:20

隔牆有耳李慧琼八方北上爆「偉論」中港聯手擊退SARS

民建聯主席李慧琼身為全國政協委員,少不免都要喺兩會期間「建言」。咁佢有乜「偉論」?八方喺新華社網站見識到嘞。根據新華網嘅全文紀錄,琼子喺會上發言時,除咗形容香港回歸後,市民權利同自由「有增無減」,更大讚人大釋法、多名民主派立法會議員被DQ,以及港府禁止香港民族黨運作係「大快人心」。
避談源頭廣州教授
如果覺得呢啲「偉論」已經好精采,其實好戲仲喺後頭。皆因琼子喺呢篇演辭中,連貴到被唔少港人鬧爆嘅東江水都大讚,好愛國咁話:「中華人民共和國成立後,即使國家遭遇困難,也讓東江水引入香港。」至於2003年搞到香港雞毛鴨血嘅沙士病毒,當年明明係由廣州中山大學退休教授帶入香港,點知琼子發言中無提呢點,避談源頭之餘,反而強調「2003年(中港)共同抗擊SARS」,但八方記得當年主要係香港人齊心協力抗疫咋噃,連時任總理溫家寶喺當年7.1前訪港都講過,係香港社會嘅空前團結同齊心協力,先贏得抗擊沙士嘅重大勝利!

琼子臨尾仲話堅信喺「黨中央的堅強領導和內地同胞的大力支持下」,一定能夠合力推動香港形勢持續穩中向好,莫非真係要講出呢啲「偉論」,先可以討好到阿爺?