「洗手 洗手 洗手」同口罩，呢兩個詞彙，由03年爆發沙士（非典型肺炎）開始，流傳至今。疫症爆發，香港可謂百業蕭條。政府為推動社會氣氛，和導演會達成協議，邀請導演拍攝短片鼓動香港精神，這就是「1:99電影大行動」。名人紅星劃一只收$99報酬，陳果就是當年其中一位有份參與的導演，他的作品，就是由Shine主演的短片：《小豬不舒服》。

十五載轉眼即逝，陳果日前接受《蘋果》專訪，憶述當日種種，稱深深體會香港世界末日感覺：「拍呢條到依家仲好記得，2003年時香港樓價跌、餐廳減價，冇人幫襯、靚酒店可以平住靚房，所有嘢去咗世界末日feel，最深刻係死咗二百幾三百人。嗰時好興買板藍根，我喺內地買咗好多返香港。」陳果驚嘆當時的香港，一片蕭條之景，巿民不願出街，香港也難得清靜，就好似過年初一時那樣。

陳果所拍短片，以一頭豬出街做主題，花了四日拍攝，他說：「都有難度，係臨時臨急，嗰時啱啱拍完《香港有個荷里活》，同一個豬場好熟，沙士同野生動物（果子狸）有關，咁我就拍我同小豬嘅關係。設計隻豬第一次出街，搵咗黃又南同徐天佑幫手帶隻豬坐的士出九龍，揀咗圓方對出一條天橋，可以睇到香港全景，表達隻豬第一次出街見到香港好開心，有啲白癡，但正面。」

「香港人都好慣做善事，例如水災、天災橫禍，都有一種慈善玩法，整體上我覺得政府係帶頭，起碼肯俾錢出嚟做嘢。大家做導演都冇乜收錢，只係工作人員收少少車馬費，但唔多。今次唔同地震、打風，係推動社會積極性。」

問陳果覺得沙士一役改變了甚麼？陳果說：「其實冇嘅，過咗又回復返，因為嗰幾年香港發生好多禽流感同不同病症，香港某程度可能幾脆弱，發生咗幾單嘢，有人犧牲，汲取教訓之後，又好似冇乜嘢，但呢種教訓好難避免。例如每年都有流感，死好多人，但俾人睇輕，兩個都係傳染病，俾人重視程度係天同地之分。」沙士後香港雖經歷過渡期，但迅速回復走勢，翌年並開通合拍片，正是香港電影踏入合拍片主導的分水嶺。

採訪：卓寶花
攝影：陳俊強
攝錄：廖達燊

《蘋果》沙士15周年系列網站，正式登場： https://hk.feature.appledaily.com/sars15/ 。