黃定光揭過幾頁書,八方問佢對六四真相有冇新領會,佢擺明唔想多提呢啲敏感話題,好無厘頭咁話,每個人都應該對唔同事件有唔同嘅認識,睇多啲書唔係壞事。黃定光唔想提,逼佢講都無謂,但佢勇於面對歷史,八方覺得值得年輕人學習,睇禁書培養正義感,好過一知半解,學似陳一諤、呂智偉咁大發謬論做小丑。
扮代表嘅煲呔更要立即睇呢本書,第一係了解六四內幕,更重要係惡補中共權力鬥爭係幾咁凶險,佢呢啲殖民地培養出嚟嘅「政治家」,幾時有見識過呢啲你死我亡嘅政治鬥爭?睇完呢本書,八方相信佢對國情會有截然不同體會。
除咗《改革歷程》,煲呔同一班左派應該睇嘅六四「禁書」清單,最少仲包括寫流亡海外民運人士心聲嘅《再回家》、記載六四經過嘅《人民不會忘記》同《歷史的大爆炸》,睇完呢幾本書,怕且煲呔唔敢再隨便扮代表。
mailto:
[email protected]