隨住轉會市場已經關閉超過兩星期，未能轉會嘅球員，任你如何扭計，亦要面對走唔到嘅情況，始終醜婦終需見家翁，英超早場，荷蘭中堅華基爾雲迪積克後備入替，終於幫修咸頓上陣，而利物浦主場對般尼，菲臘比古天奴更加首度以正選姿態為紅軍出場；領隊高路普亦刻意提一提紅軍球迷，唔好再諗過去，要好似歐聯後備上陣咁，熱烈歡迎古天奴。

坦白講，高路普為咗「氹番」古天奴，簡直用盡方法，沙迪奧文尼停賽，一般預期古天奴會頂替佢嘅左翼位置，不過高路普冇咁做，三叉戟係羅拔圖法明奴、穆罕默德沙拿同史杜列治，相反古天奴可以做巴西傳統10號仔，盡情中場較炮。但高路普以及利物浦隊友，都想讓古天奴做進攻核心，有意無意都傳波俾佢發辦，但就拖慢咗進攻節奏。紅軍所入一球，就係安利簡恩一個長傳，交俾沙拿冷靜控定射入，簡單、直接，事實上高路普打出嘅壓逼性踢法，就係以速度為先，重用古天奴，就浪費沙拿、法明奴等隊友速度，無錯古天奴下半場2、3次個人突破後遠射，盤扭幾有功架，但始終狀態爭啲，結果都係射失。

如果將紅軍失分歸咎於古天奴，又未免太嚴苛，但高路普還是要考慮自己進攻最大殺着係咩？

文：牽牛