個案一：半年白交月費
將軍澳公屋景林邨居民馬小姐投訴，她去年九月開始使用和記環球電訊上網網絡，簽約一年，月費160元，但半年來，她一直不能順利上網，經常一登入即斷線。
「根本唔可以好好哋睇完一個網頁，覆朋友電郵都覆唔到，真係好麻煩。因為咁我已經成日向和記投訴，佢哋都上門整咗八次，都重係咁。我好似白交半年錢咁，熱線又成日打唔通，又要次次等佢哋嚟，好唔方便。其實我都提過想終止合約，但係佢哋就話再整吓，結果都重係咁，真係好難忍受。」
和記環球電訊回覆本報查詢表示，和記職員曾多次到馬小姐家中測試，發現線路正常，職員已要求馬小姐提供更多資料，了解其上網時出現甚麼問題，再為其跟進。
個案二：每月都要維修
天水圍居屋天盛苑居民羅小姐投訴，她02年9月開始使用和記環球電訊寬頻上網網絡，月費156元，但經常不能上網，每個月網絡均會出現故障及要技術員上門維修，令她不勝其煩，技術員每次均推說與他們無關，乃租線給和記之固網商問題。
羅小姐說：「我𠵱家係畀錢和記，和記係有責任搞番掂，唔應該影響到客戶呀！」
和記環球電訊回覆稱，天盛苑雖屬和記網絡覆蓋範圍，但和記需向另一固網商租用「最後一哩」線路，方能為屋苑用戶提供寬頻上網服務。
和記環球稱，接到羅小姐查詢，即派員上門測試，多次結果顯示，為有關租線固網商之機房線路問題；經有關固網商及和記技術員檢查維修後，網絡已恢復正常。