劉威煌今日到商台宣傳新歌《灰狗》，佢話首歌係講人生，而佢每次做歌都覺得可能係最後一首歌曲，今次都唔例外，威煌解釋：「要取得唔錯嘅成績，有所交代先至能夠有機會做下一隻歌。好多人認為搵錢好緊要，搵到錢先至係成功。」

之前劉威煌轉行營商，喺葵廣開舖賣珍珠奶茶，仲親力親為落場沖茶兼看舖，今年初佢仲話要幫手調停員工，搞到好攰（新聞連結： http://bit.ly/2wUvJsm ），佢今日話其實睇舖時，都試過被人「評論」，佢話：「有人喺舖頭見到我，問我點解唔唱歌，又見我喺舖頭看舖，就話我腳踏實地咪幾好，乜原來唱歌好唔腳踏實地？張學友咪好唔腳踏實地？」威煌另表示，會喺facebook做卡拉OK點唱，又會似DJ為網民讀出來信。