大家好，我係阿榮，一個住緊喺日本嘅香港人。喺日本住咗呢三年裡面，我先發現原來我身邊都有好多鍾意香港文化嘅外國人。

先講我老細，佢係一個我諗五十幾六十歲嘅女人（唔肯定佢幾多歲呀，次次講親年齡佢都逃避我哋）。如果要用一個詞語嚟形容佢，我會用以下呢兩個字——黎明。

唔好get錯，唔係日出個黎明，係歌手個黎明呀！！！！！

因為佢真係好鍾意黎明㗎！！！！！！！！！！！！

佢以前後生嗰陣，一年會飛十幾次香港，就係為一睹黎明嘅風釆，佢仲會參加啲歌迷聚會呀又會去電影首映禮咁。上次佢喺屋企搵到幾本相簿，特登帶返公司畀我睇，一睇，入面全部都係吳君如呀黃秋生呀張學友呀啲明星相（但唔知點解竟然冇黎明，黑人問號咗）！！！！

因為黎明，佢識咗一班志同道合，成日飛香港追星。佢仲成日同我講，佢好鍾意食香港嘢，茶餐廳呀去飲茶之類咁，最鍾意去半島high tea食佢哋個青瓜三文治！！話身邊啲去開香港嘅日本人次次都要去咁喎！（聽完老細講我上次真係去咗食，又真係有幾張枱都係日本人嚟嘅，不過佢講嘅青瓜三文治就真係青瓜三文治囉）

雖然佢咁鍾意香港，但就同好多日本人一樣，都仲係接受唔到食雞腳，話視覺上接受唔到喎！！！！（對於好鍾意食雞腳嘅我表示完全不理解，明明就好鬼好味！！！！！！）

老細話佢係第一次請外國人（成間公司得我一條外國人），仲要係香港人！！！覺得係一種緣份！！！！每次同老細講起香港，我哋就會傾得好開心，講到其他同事都加把嘴埋嚟話想一齊去香港玩！

除咗我老細，仲有一班鍾意香港鍾意到要學廣東話嘅日本人。
早排，我識咗個識講流利廣東話嘅日本人，佢鍾意香港鍾意到喺日本開咗間公司嚟教廣東話，你以為冇咩必要邊有外國人想學廣東話？你錯喇！！！！！！
我本身都以為邊有人學丫，但原來真係有！！！！！

有兩次我被邀請去佢嘅課堂幫手，喺班入面有兩三位太太，佢哋同我老細一樣，都係成日飛香港！！！

我問佢哋點解咁鍾意香港？？佢哋異口同聲地話：「香港嘢食真係好好味！！！！！」

佢哋廣東話仲未係好好，餐牌都仲未睇得明，但係因為咁，佢哋亂咁點咗唔知啲咩嗰陣，有陣時會上咗啲好好味嘅嘢食，真係好刺激咁話！！！！有位太太仲會成日同佢老公飛香港，就係為咗去食！！！

除咗嘢食，佢哋都好鍾意香港電影，講流利廣東話嘅日本人係咁介紹我睇劉德華套《寒戰》，仲話《寒戰2》好睇啲！！！

而另一位太太佢話佢鍾意周星馳！！！

竟然！？？！！！

講真周星馳啲戲啲gag咁無厘頭，日本人聽唔聽得明㗎？佢話佢就唔係100%明，但係本身個劇情就好好笑！！！為咗可以更加明白香港電影嘅精粹，佢下定決心要學廣東話！！！呢班嘅咁多位都覺得廣東話好好聽，啲抑揚頓挫好型！！！用「型」字嚟形容廣東話，我都係第一次聽！！！

以為只有香港嘅飲食娛樂吸引到外國人，冇諗到仲有一位年輕女學生。佢話佢即使自己一個，都要成日飛香港。除咗鍾意香港嘢食之外，佢仲話鍾意香港嘅舊樓！！！！話好有風味，就喺個陣個流利廣東話日本人就拎咗本深水埗寫真集出嚟！！！佢哋一路睇一路「嘩真係好靚！！」「嘩好想去呢度！！！呢度點去，下次我要去呀！！！！」

喺個一刻我覺得，佢哋比我更了解香港嘅美，比我更喜歡香港。

除咗日本人，我有個識咗好耐嘅台灣朋友，佢同屋企人去咗香港一次就愛上咗香港，話香港真係好靚好多好嘢食！！！！自嗰次之後，佢見親我都問我幾時同佢去香港帶佢去玩！！！！另外仲有個喺工作認識嘅英國人知我係香港人之後，特登send咗篇email同我講，佢十幾年前去香港旅行嗰陣玩得好開心，到而家仲記得，睇到我好感動！！！！

或者有好多人覺得香港只係一個密密麻麻又迫嘅地方，早排仲有篇報導話台灣人去過一次就唔想去嘅城市首位係香港。可能佢哋玩嘅只係好表面嘅香港，單靠幾日未必了解到香港到底有咩特別，但欣賞香港最核心嗰種香港風情文化嘅人仍然大有人在。呢種風情唔係來自依家鬧市一式一樣、懶係新潮嘅商場，反而係香港一直以嚟嘅舊有文化先最引人入勝！！！喺細到咁嘅地方，有佢獨特嘅文化同情懷，細得嚟佢五臟俱全，新舊共存。只可惜有啲香港人自己都唔理解呢種美。

不過見到一班外國人咁鍾意香港，作為一個香港人，係有種講不出聲嘅開心同有份莫名嘅感動！！！


專欄作者簡介：
阿榮
喺日本大阪生存緊嘅香港人，做緊間廣告agency。曾經將喺石川縣活過嘅地獄天堂史寫咗本叫《25歲，日本打工血淚史》，間唔中會喺個叫《25歲，我去左日本做野，點知⋯》嘅page度講無聊嘢。
做人最緊要熱血，只要有得瞓同聽音樂就乜都得。

Facebook專頁：
https://www.facebook.com/winginjp/