韓劇《漂亮男人》男星張根碩最近是非纏身，因為被韓媒爆料話佢已經向國稅廳繳交超過約七千萬港元嘅罰款，搞到形象直插水，原本佢有份參與大熱綜藝節目《三時三餐》嘅演出，但因為電視台知道有唔少觀眾對張根碩嘅演出都表現出擔心，所以日前張根碩方面就話同電視台商量之後決定退出節目，由於節目仍在拍攝中，所以電視台都即刻搵咗另一男藝人孫俊浩嚟頂替。

雖然冇得撈《三時三餐》，但係張根碩都懶理呢啲新聞，根據韓國方面嘅地產消息，張根碩近日就買咗江南區三成洞宣陵路上價值213億韓圜(約1億5千萬港元)嘅大廈，呢幢大廈位於地鐵7號線同盆唐線江南區廳站300米左右地方，有三層地牢，樓高六層，可見張根碩銀彈充足。而佢亦都確定會參加本周六嘅TeamH公演，TeamH係張根碩所屬公司Unit嘅名字。因為今次演出已經準備咗好耐，大家都付出好多心血，所以希望令久等嘅粉絲繼續欣賞演出。