最近回歸無綫拍劇嘅馬浚偉，今日竟然現身亞視總台，唔少人見到都覺得好愕然，不過馬仔話查實o依家係自由身，可以去唔同電視台宣傳，佢又話：「好多人都以為我為第一次入亞視，其實好耐之前做過一個宗教節目，嗰陣前亞視已經準備唔運作，所以我都有喺台徽面前自拍留念！」

今次再舊地重遊，馬仔走咗去亞視大堂扮 reception聽電話，又同曾醒明喺台徽影合照，馬仔話：「地方大咗好多，最開心係入到嚟見到全部都係tvb嘅人，全部都係以前嘅同事，真係好親切。」今次佢係去錄影《A1娛樂》，主要係宣傳舞台劇《偶然·徐志摩》：「唔知TVB套劇講唔講得，不過都應該可以照講，不過我好早已經download咗亞視個apps，有睇佢哋啲直播，又有現百萬富翁，我仲答啱咗三條問題，可以上嚟現場玩，但係我好怕輸，尤其係呢啲資訊性嘅節目，我會讀好多書去準備，真係壓力好大，如果有啲輕鬆啲嘅慈善版先再諗！」

馬仔仲話：「今次上嚟做娛樂專訪都開心，o依家係自由身，個個台都可以去做訪問，一啲都冇影響，宣傳各有各做冇衝突！」馬仔正為舞台劇綵排，佢話因為成個班底係全新，暫時佢會抽身做導演，睇吓大家同角色有冇可以搵到更多內容，我發現最有火花係姜大衛，對方鬼馬又貪玩，最初都擔心一班前輩難以磨合，點知原來係咁好玩。」

精選娛聞，喺晒《娛果》
http://fb.com/appledailyent