到底要有幾多歷練，先可以令一個人目空一切，唔理世俗眼光？到底要有幾大勇氣，先可以好似Juno咁，戴頂Oversize笠過眼嘅冷帽上節目，唔講仲以為係藍精靈真係人版，仲有網民話係「避孕套笠上頭」呀。

麥浚龍出咗名有獨特嘅潮流觸角，次次出嚟都「型不驚人誓不休」，佢今晚出席大台節目，以一個常人不能理解嘅造型現身，戴咗頂超巨型黃色冷帽笠過眼，演唱《念念不忘》，只能夠講佢頂帽style係玩兩極。

呢種兩極嘅style一係超細，一係超大；佢前排戴嘅帽都係cover唔到個頭，類似新疆維吾爾族嗰隻，而今次就係超大，離譜地oversize。其實有唔同artist都玩過呢類style，外國歌手PharellWilliam嘅大帽造型好出名，仲有香港嘅「潮流教母」徐濠縈都剪過一個前蔭近似全部遮住眼嘅髮型，本地樂隊觸執毛主音JanCurious上台表演都試過整完全遮蓋雙眼嘅髮型。至於型唔型呢，就見仁見智啦。

不過大家又可以咁樣諗，Juno呢個望唔到人，人哋亦望唔到佢嘅巨帽造型，可能係藝術家一種「外人無法認同/理解我」的暗示或投射。所以大家喺話﹕「fashion嘅嘢我哋識條鐵」嘅同時，都可以試吓理解artist嘅內心世界。