面對AC米蘭來勢洶洶，羅馬亦有適當「補強」，力爭意甲7連冠嘅祖雲達斯當然唔敢怠慢，周一宣佈以4,000萬歐元（約3.6億港元）收購費倫天拿翼鋒貝拿迪斯治，雙方簽約5年。23歲嘅貝拿迪斯治出身「紫百合」青訓，近季喺意甲嶄露頭角，去年更晉身大國腳，最終成為祖記今夏繼簽入借將古達度、貝拿迪亞，加上借用杜格拉斯哥斯達，以及羅致迪施基利奧、施捷斯尼同賓坦古亞後第7簽。貝拿迪斯治喺官網表示：「我呢一刻情緒相當高漲，好多謝每一位在場迎接我嘅球迷，佢哋令我感受到熱情。我希望盡快令自己準備就緒，同隊友、教練並肩作戰。」

雖然位置上唔係重叠，不過同日有意大利傳媒報道，指「斑馬兵團」嫌車路士對中場尼曼查馬迪叫價4,000萬鎊（約4億港元）太高，所以已經退出競逐，令呢位28歲塞爾維亞中場轉投曼聯、同領隊摩連奴故劍重逢嘅機會大增。不過，英國傳媒早前報道，指車仔對曼聯同祖記分別開出兩個轉會費，紅魔要畀夠5,000萬鎊先可以斟到馬迪，就睇吓佢哋捨唔捨得俾人搵笨啦。