45歲蔡少芬（Ada）、52歲陳法蓉、47歲朱茵、48歲洪欣姐妹情深，Ada在微博晒素顏合照，留言：「其實……我真是好自信！」事關四人裏面，只有蔡少芬冇戴黑超，夠膽以真面目冇遮冇掩示人，身為91年港姐季軍嘅Ada，果然自信心爆棚。網民都留言讚：「顏值爆表」、「四大美女姐姐」！

89年港姐冠軍陳法蓉就轉發相片，抵死留言：「港普F4」之前Ada被老公張晉在微博公開取笑普通話水皮，激到Ada嬲豬留言警告：「有人命不久矣！」估唔到陳法蓉都玩埋好姐妹一份，網民好奇問：「想知道誰的普通話最好？」有網民答：「當然是陳法蓉的普通話最好啊！」

台灣F4係言承旭、周渝民、吳建豪同朱孝天，那些年佢哋憑偶像劇《流星花園》爆紅，依家陳法蓉自封同好姐妹係「港普F4」，網民力撐：「期待2019港普F4出道！」、「F4必須C位出道！」、「羨慕F4的姐妹情感」！

精選娛聞，喺晒《娛果》
http://fb.com/appledailyent