潘頓昨日(19日)復課獨替沈集成之「幸運名駒」操練，今朝佢到場又係獨操一駒就收工，邊隻馬獲騎者「寵幸」？咪就係賀賢馬房隻「可人兒」，在大圈快踱一圈，此駒自從8月1日復課以來差不多日日露面，今朝連踱步都由潘頓親力親為，可見備受騎者重視。
「可人兒」上季兩戰均由潘頓經手，初出於新馬賽即勝，閘前更瘋狂落飛，反映幕後自視甚高，翌仗孭頂磅增程跑1200米，搶口浪費不少氣力仍能捱入一席季軍位置，暑期獲評68分唔算高，新季原庄配搭再來，有力征服三班。