去年憑一條鮮紅長裙加外套突圍而出，以「人形龍蝦」享負盛名嘅特首夫人梁唐青儀，噚日出席佢嘅廚餘機構齊惜福喺工展會搞嘅「名廚齊惜福」活動，被問到鍾唔鍾意食龍蝦時，自爆其實好鍾意，龍蝦伊麵更加係爆like。
梁太唔知係咪對蝦情有獨鍾？噚日品嚐由工聯會麥美娟同名廚周中炮製嘅菠菜頭炒蝦仁時，索性用手攞住食，夠晒風味。當食到民主黨劉慧卿同名廚何志強炮製嘅炒飯時，傳媒就問梁太鍾唔鍾意食龍蝦？原本暢所欲言嘅梁太即時踩brake咁煞慢，慢慢吐出「鍾意」兩粒字，然後話：「我鍾意食龍蝦伊麵，真係㗎，係呀係呀！」
講起龍蝦就停唔到，仲話要向記者介紹英國一家唐人餐館叫文華，「佢嘅龍蝦伊麵好好食，都係我嘅至愛。」梁太身旁嘅助理似乎唔想梁太講落去，即時叫記者「你哋都試吓啲炒飯。」
梁太都被人話似廖偉雄所扮嘅乜太㗎。八方唔知梁太係咪得閒時都會入廚，只知佢話前晚已經做冬。

問助手借錢買光波爐

問及齊昕鍾意食乜餸，梁太話：「佢乜都鍾意食！」補充話齊昕特別鍾意食肉，但不時轉口味：「你知女仔貪靚㗎嘛！」佢大爆三個仔女平時就最鍾意食咕嚕肉、蒸鯇魚、肉餅；至於佢老公CY？梁太答得最快，話CY最鍾意食水餃。
梁太透露聖誕會外遊，而佢噚日喺工展會一度想買嘢，但畀錢時發現好似唔夠現金，佢嘅助理好識做即時幫佢付鈔，最終買咗個光波爐返屋企，可能都係要嚟整番幾味。

李八方
mailto:[email protected]