長和系接班人李澤鉅（小超人）一向畀人較為冷漠嘅感覺，以往佢答小股東或記者問題，都唔多笑容，兼且一句起兩句止，噚日佢主持長建（1038）股東會，竟然有問必答，仲要做埋繙譯，照顧聽唔明廣東話嘅小股東，心情靚到不得了。
小超人係長建主席，爸爸李嘉誠唔喺長建董事局，所以噚日長建股東會，李嘉誠冇現身，由小超人主持大局，小股東一樣有好多問題。
之前市場猜測電能（006）可能跟長建合併，有做功課嘅小股東問小超人有冇呢個可能，小超人笑住口咁話，「呢個問題答咗你，我要炒魷」，之後仲慢慢解釋，指「港交所、SFC（證監會）都會睇緊，所以我唔可以隨便答你呢個問題。」

為令小股東放心，佢又補多句話「我哋會不停喺長和系為股東增值，唔會坐係度唔做嘢。」雖然小超人呢堆答案都係講咗等於冇講，但起碼佢唔係答一句就算，都幾畀面㗎喇。
輪到會上有小股東用英文問佢，美元滙價強勢同歐元轉弱，長建喺海外有咁多生意，有乜影響呢？雖然大會有安排工作人員即時傳譯，但小超人用廣東話答完一輪之後，索性自己繙譯埋，「Let me do the translation here……」佢繙譯得仲好過即時傳譯嗰位人兄㖭呀。
臨到尾段，有小股東問佢將來點樣幫股東增值，小超人風騷咁話「仲唔滿意呀？」佢咁講又有道理喎，長建噚日收報64.85元，較舊年底累升逾一成，以一隻收息股嚟講，算係交到功課，呢隻始終唔係炒股！呢次華華都buy佢。

李華華
mailto:[email protected]