特區政府成日都話要向更多基層公務員提供國情培訓課程，一眾副局同政助都要專程赴京參加國事研修班，等佢哋更加認識祖國，但呢啲培訓係咪漏咗班問責高官呢？

久未喺公開場合蒲頭嘅律政司司長鄭若驊，今午出席工商界婦女國慶午餐會，竟然喺唱國歌環節全程「封口」唔唱，同身邊一眾唱得興起嘅嘉賓，包括基本法委員會副主任譚惠珠，形成強烈對比，唔知講英文叻過中文嘅司長，係咪唔識唱啦，之但係將來國歌法若果立咗法，小心全程木立會畀人當做唔尊重同故意貶損國歌喎！

唔唱國歌之時，鄭若驊選擇唱好大灣區，致辭時搬出即將通車嘅高鐵、港珠澳大橋同埋已知嘅國民福利，包括居住證等，力證兩地融合順利。佢之後講返自己專業，數香港到底可以點喺法律方法促進大灣區發展，佢話冇一個地方律師比香港了解中國情況，所以首項律師服務係探討香港律師行同內地有更多聯營安排，「好快會有比較好結果」，佢仲食住大灣區主打創科勢頭，積極推動法律創科結合，推廣線上解決爭議嘅服務。