諸葛紫岐自2012年與Neway太子爺薛嘉麟結婚後,一直過住少奶奶嘅生活,最近又轉戰做女強人搞娛樂公司,早前傳出同老公婚變,幸得諸葛母親出手調停,二人和好如初,上個月仲為囝囝Arthur薛華韜搞咗個大型生日P,囝囝扮成小皇帝,仲有宮女侍候。
《蘋果》今日又影到佢哋一家三口享受家庭樂,兩公婆同囝囝去咗銅鑼灣,最初見到諸葛紫岐同一位女友人嘆完茶離開,之後佢行到利園商場嘅童裝部,原來老公薛嘉麟陪緊囝囝喺遊戲室玩,仲有兩個工人照顧。諸葛紫岐嚟到之後見有記者影相,即刻入咗書店,囝囝揀咗本圖書,爸爸就負責畀錢。
諸葛紫岐拖住囝囝離開時,笑容滿面叫囝囝同記者打招呼,佢表示聖誕陪囝囝參加學校嘅郵輪假期:「成日同老公囝囝行街買嘢,元旦會留喺香港同家人一齊過。」