【本報訊】對於秘書阿May生意失敗，創業顧問搞生意932聯席董事周兆輝認為，由於未知道她單位裝修、服務質素及宣傳手法，從其租用物業位置及租金來看，估計死因是客量，「無客，就要諗方法，例如有啲時段提供100蚊套票，唔係做美容，純粹係畀人瞓覺休息嘅！」

留意租約條款

周兆輝表示，創業前考慮兩方面，分別是收支平衡及個人能力，後者除經濟能力，還包括有無能力營運。「有人喺飲食行業打工多年，掌握收支，又有能力應付，當然可以自立門戶。若完全未接觸行業，瞓身做都可以，但本身得100萬，花八、九十萬去達成夢想，剩二、三十萬，日後會造成壓力。」
唔熟唔做，更重要是客底。即使新興行業，事前也可預計目標客群，他舉例：「例如係鍾意美容按摩嘅客，事前會唔會盡量識呢啲人，例如相關商會、機構，互相交流，開張時可以合作、轉介……遇到無客要諗方法，例如度個優惠套票100蚊，不是美容，純粹提供短睡空間。又或者夥拍美容集團、健身中心，轉介客戶又得唔得呢？」
生意唔掂，「成日諗住點樣做好啲，忽略同人傾偈，參加商會、同業活動，睇雜誌或者揭到啲嘢，或者cold call行家，有冇合作呀？或者免費借場，租房畀美容師，既然場喺度又用唔晒，租畀獨立美容師做freelance又得唔得呢?」
搵舖簽租約前，注意條款，就算幾麻煩都逐條讀一次，就像阿May的情況，其實舖位還原是常識，一般要求租客鋪平地台、牆身，通風及消防系統運作正常。