樂施會請咗嫻姐陳婉嫻、超人林超榮、小學校長梁紀昌，仲有一位預科女生陳霈榆一齊玩個game，除咗梁校長抽中扮演中產教師外，其餘三人嘅角色都係月入幾千嘅基層打工仔。佢哋一路擲骰，一路叫苦連天，好似扮演地盤工嘅超人，踩中一格俾人裁員，要抽卡轉工，但份份工最少要求中學學歷，呢啲工作係樂施會喺勞工處抄返嚟，超人大讚夠寫實，最後佢抽中一份派傳單嘅工作，月薪由7,000跌到得3,000蚊。
旁邊嫻姐猛話：「越做越低薪，係基層勞工寫照！」嫻姐果然了解基層心態，佢喺遊戲中扮演跟車送貨，擲到一格可以買六合彩，諗都唔諗就買，「人窮梗係要博啦」。可惜佢擲幾次骰都係得個桔，浪費咗20蚊。至於同學仔陳霈榆扮演清潔工人，一樣越窮越見鬼，又工傷又被裁員，玩咗半個鐘成副身家由9,000蚊得番500蚊，成為大輸家。
最終只有梁校長係唯一財富有增長嘅玩家，因為佢喺遊戲中抽到免稅優惠，又抽到兼職監考員，梁校長好肯定咁話「知識就係財富」。不過嫻姐就有另一番體會，佢話遊戲證明咗政府派糖窮人冇受惠，最慘仲係基層無法向上流動，「以前大學畢業係可以賺到錢，家碩士畢業都冇人請，況且就算想進修都冇錢」。