「股壇大隻佬」郭思治（郭Sir）舊年底同耀才證券（1428）講拜拜，噚日正式過檔民眾金融（279）旗下民眾證券擔任董事總經理，隨即着手籌備開設網上財經台，主打內地市場，吸納大媽做客仔，對郭Sir嚟講應該完全冇難度。
最近越來越多人開網台講股票，郭Sir以前喺耀才做開，幫新公司做一定駕輕就熟。郭Sir指，網台針對內地同香港觀眾嘅比例，會係7︰3，所以普通話同廣東話都有齊，「咁𠵱家有滬港通、深港通，內地投資者係天文數字，所以一定放多啲資源喺內地。」

最快6月開台

節目方面，佢希望做到交易時段全天候播放，不過仲要研究清楚，廣東話節目就應該會邀請佢嘅股評人好友相助。為增加可觀性，而大家又知郭Sir最鍾意健身，佢就諗住拍大約十集，講健身、減肥、keep fit，仲會親自喺鏡頭前示範㖭呀，咁到時大家可能睇到嘩嘩聲喎。
至於幾時出街有得睇，佢話自己啱啱返工，公司租咗中銀大廈40樓全層去做網台，嚟緊會做裝修、買器材、請主播，估計最快6月先可以開台。郭Sir強調，唔會搵以前耀才女主播幫手，屬意請新面孔，冇財經知識可以慢慢教，最重要係說話清楚夠淡定喎。

李華華
mailto:[email protected]