「我信命運！」黃創山說。「當年，一係跳樓，一係面對，即係冇得揀。」八、九十年代泰國首富之子，曾是香港傳奇足球隊精工的班主，九七金融風暴，將他由山頂扯落地底。

球場上永不言敗，最終卻以一蚊賣走上市公司，敗走香港。看來狼狽，其實是斷臂求生，黃創山選擇返回曼谷修鐵路。這條架空電車BTS，後來成為曼谷市中心的交通命脈，亦再次扭轉黃創山的命運。

今日，坐擁四間曼谷上市公司，掌控千億基建、地產及媒體王國，黃創山「衣錦還鄉」，獲特首林鄭拜訪，與糖王郭鶴年聯手搵食。黃創山難忘當年風水師傅一句話﹕「喺最壞嘅時候，佢同我講﹕你一定唔會係咁，我睇到你會企返喺座山上面。」

「中國龍」視香港為家
訪問在曼谷進行，午後，黃創山帶同兒子黃瑞耀一家，坐私人飛機回香港，慶祝母親節。「返香港搵老婆。」黃創山妻子與女兒仍住在飛鵝山明華園大宅，他和兒子不時回港探望。

「我十三歲去香港，九八年走，前後三十五年，仲耐過我喺曼谷嘅時間。」曼谷出生，在泰國商界人稱「中國龍」的黃創山，仍視香港為家鄉。當年因搞足球而結緣的朋友，包括南華會主席盧潤森、前足總主席余錦基等，仍是他的飯腳。另外，霍震寰、霍震霆兄弟，鷹君的羅嘉瑞､羅康瑞，均屬世交。但講起再投資香港，黃創山即就耍手擰頭﹕「香港樓好貴，基建冇空位，泰國機會大好多。」

曼谷市區，BTS附近，正在建造中泰鐵路，是中國「一帶一路」的重點項目。扎根香港的嘉里集團，亦睇中當地商機。四月底，嘉里物流(636)宣佈，引入BTS的附屬公司為戰略夥伴，聯手進攻泰國物流業。「依家香港、中國嘅公司都來搵我哋合作。」黃創山說。

複製港鐵 贏在起點
「如果九八年揀左留喺香港，我就冇今日。」當年黃創山並非做逃兵，而是返曼谷撲火。金融風暴，泰銖崩盤，以美金舉債的BTS，負債「一蚊變三蚊」，暴增至過千億泰銖(當時折算約二百億港元)，但他堅信只要BTS通車，就有翻身機會，「BTS位處曼谷心臟位置，就等同香港嘅MTR。」黃創山一開始已打算將港鐵模式，照辦煮碗搬到曼谷。「九二年投標，我哋最專業，因為我喺香港MTR請左班人來幫手，另外兩間本地公司，一間就咁拿架巴士喺架空路軌上面行，另一間抄巴西系統，用泵嘅，即喺遊樂場用嗰種。」

九八年BTS重組，獲得香港新世界集團及韓國三星集團等白武士的支持，終於九九年成功通車，黃創山邊做邊還債，「銀行嘅錢基本上還晒，喺利息打左折。」BTS起死回生，但同於九十年代，由香港合和實業投資的鐵路，就「爛尾」收場，現於曼谷仍能看到一座座廢棄的橋墩。黃創山解釋：「大家投資嘅路線唔同， BTS喺曼谷市中心嘅中心，胡生(胡應湘)嗰條喺曼谷市嘅邊皮，接駁曼谷機場，運人出市郊。」

圈地起樓 港人落疊
BTS獨佔地利，成為生金蛋的鵝。黃創山「學野學全套」，仿效港鐵發展地產，早年已密密以低價買地。「有路軌去到嘅地方，地產就會升值。我哋預先知道個站喺邊，就可以快人一步買入周邊嘅地皮。」黃創山指公司的土地儲備達二十四億平方米，市值約一百億港元。

兩年前，BTS開始與泰國三大發展商之一的Sansiri合作，在BTS沿線起樓，當中不少買家是香港人，部分樓盤的港人買家比例近兩成。「我哋有地，佢哋有經驗，依家已經做左十一、二個盤。」黃創山表示，曼谷塞車問題嚴重，BTS成為樓盤的最大賣點。

一五年，黃創山收購在曼谷上市的地產公司U City，注入地產業務。去年六月，進軍東歐，於歐羅低位時，狂掃酒店。「依家有三十九間酒店，業權連同管理，分佈係柏林、捷克等地。我睇好東歐發展，嗰邊物價便宜，會喺好受歡迎嘅旅遊點。」

痛苦經歷 唔好再來一次
以鐵路帶動地產，最大的投資仍在基建上。去年，黃創山再投得兩條鐵路，投資額約一千億泰銖(二百五十億港元)。最近，又準備投標另一投資額達二千億泰銖的高速鐵路。再斥巨資修鐵路，令人聯想起BTS差點沒頂的教訓，黃創山形容：「絕對喺痛苦嘅經驗，唔好再經歷一次啦。」

「亞洲金融風暴前，泰銖嘅匯率好穩定，一蚊泰銖兌三、四蚊港幣，維持左廿幾年，大家都冇經驗。」二十年過去，當年的慘況仍歷歷在目。「呢度幾乎間間公司都出事，好多人拿曬屋企啲金呀錶呀，就咁擺係車尾箱賣，俾香港人來買。」黃創山妻子亦曾拿出私己珠寶，欲助丈夫還債，「好彩冇賣到，呵呵。」銘記在心的，除了妻子的恩義，還有外匯的兇險。黃創山直言，現時泰國項目的報價都是用泰銖，「因為我哋收入喺泰銖，如果要用外幣，就一定做足對沖。」

好勝人生 打得就相信會贏
最艱難的時刻，黃創山沒有想過破產，亦沒有開口向父親兄弟求救。黃創山父親黃子明叱咤泰國、香港商界，曾是泰國首富。「幫唔到，等同倒錢落海。」認識黃創山的人，都知道他打仔性格，搞精工時，每場波都去到盡，「打到加時都同你死過！」不服輸，為他帶來最後的勝利。

「就快七十(歲)，望返轉頭，我係好勝，當年搞足球，相信會贏先去搞。」如今連球賽都沒看的黃創山，回想起精工歲月，仍十分牙擦：「老一輩嘅體育記者都記得，我講得出就一定會出現！我亦係第一個用衛星直播意大利聯賽俾香港人睇，嗰年意大利拿咗世界杯冠軍，好hot，冇人預計我可以做到。」就如九七一役，黃創山亦形容是「奇蹟」，還應驗了風水師當年的批語，不但爬起身，而且站得更高。

採訪：黃菲菲
拍攝：林志謙