股仔洗倉潮蔓延，起錶價1成以上，加埋個市咁弱，斬倉料陸續有來，仲揸緊細價股嘅戰友，都係盡快跳車。想提吓思捷（330），自稱仲值263億港紙，比家陣市值高成倍，仲話係德國女士最愛品牌，咁Hardsell真爆趣！諗真啲，歐洲經濟咁差，思捷翻生嘅關鍵喺亞洲（或者中國）市場，而非歐洲，希望管理層Sell嘢唔好捉錯用神。
市況咁差，短炒相當困難，大價股跟市跌，細價股唔掂得，不妨吼吓MSCI新貴，如近日表現穩如泰山嘅高鑫零售（6808），7月上市，係內地龍頭大賣場（大型綜合超市）營運商，全國逾百家分店，以「大潤發」及「歐尚」品牌營運，上半年營業額345億人仔，按年增長24%；賺7.84億人仔，勁升42%，毛利率19.9%。除非阿爺經濟硬着陸，否則內需概念仍然吃香，高鑫可持續高增長，加埋市值逾千億銀，交投活躍，日後隨時可染藍！
德銀計過數，MSCI於上周三公佈加入高鑫後，指數追蹤基金要用9.2日買貨，反映家陣仲買緊。高鑫整固3日後，昨低開高收，兼獲逾億元成交配合，隨時再展升浪，不妨11蚊附近上車，先睇上市高位12.06元，跌穿10.20元止蝕。
魏力