網上昨日瘋傳一段印傭遭講廣東話老僱主掌摑和扼頸的片段後，今日另一段相信是事件的「前傳」片段亦經網上流出。事緣疑是女傭走入房間為手機充電並一度上網，期間她關上了房門，惹來婆婆不滿她鬼鬼祟祟似有所隱瞞，結果雙方發生口角，繼而演變到後來的掌摑和扼頸事件。

前傳片段長約13分鐘，片段一開始即見婆婆在房間內大罵女傭：「仲慘過係殺父仇人呀！你想點，你講吖？」女傭委屈地說：「我問你想點？點解婆婆搞我，我唔明喎，我唔係錯喎。」

婆婆見女傭駁嘴，氣上心頭說：「你頂我嘴，咩唔錯呀，你頂我嘴頂到我好心痛！」女傭於是道出原委據理力爭：「我熄燈你問我係咪講電話，我話上網，跟住你鬧我。」婆婆聽罷則指「絕對唔係咁」，又說：「你上網咪上網囉，嘥得我幾多電啫，你使乜咁鬼祟關埋度門啫．．．你鬼鬼祟祟呃我，我唔鍾意咁樣。」

其後婆婆繼續質問女傭：「仲咩樣樣都要鬼鬼祟祟啫，叉電咪叉電囉，叉一次電話都已經用成個禮拜，使唔使晚晚叉？我一個禮拜都係叉一次」；又指罵女傭：「做工人你都算惡嘞！」

惟女傭繼續還口，更多次說印尼話，氣得婆婆不明所以，認定女傭是咒罵她，對女傭說：「你試問我有咩待薄你，你食咩我食咩，你都唔滿足」，又大罵女傭：「你對老人家咁差嘅，差到離晒譜，你日後都會老嘅，你顧住自己老嗰時」，更揚言：「我係老人家咋．．．你蝦我，好難嘞，唔使旨意！」

兩人口角期間，婆婆出氣後，曾數次欲步出房門了事，惟後來還是氣難下折返房內。其間她喋喋不休對女傭說：「我對你好，你都對我唔好，我就一定要你唔好，做人都唔知足。有咩要過你做吖，有咩咁辛苦？坐喺度得閒到死，衫唔多件洗，掃吓地、抹吓地，洗吓兩個廁所，洗吓沖涼房，抹吓廚房，咁有咩你做吖？你去第二度做到你死呀，邊有咁他條。」之後女傭多次用印尼話說話，令婆婆情緒激動，結果對女傭掌摑和扼頸。

你敢爆，我敢獎！ 即Call《蘋果》24小時爆相爆片熱線 ：63836568