韓國媒體成日搞出好多唔同嘅選舉，適逢噚日係「親吻情人節」，一間知名婚姻介紹所公司就向400多名未婚男女進行調查，要佢哋選出「擁有誘人親吻嘴唇嘅明星」嘅問卷調查，最終由兩部大熱劇集嘅男女主角成為冠軍。

當中人氣tvN劇《又，吳海英》嘅女主角徐玄振就以38%嘅得票率成為女仔方面嘅冠軍，緊隨其後就包括韓片《下女誘罪》嘅金敏喜、韓劇《沒關係，這是愛情》嘅李成景、《回來吧大叔》吳漣序。

至於男星方面，韓劇《好運羅曼史》男星柳俊烈就以42%嘅得票率成為冠軍，排第二係說唱歌手SimonDominic(33%)、男團TeenTop成員Niel排第三位(16%)、韓劇《OhMyVenus》男星成勛排第四位(4%)。

而人氣劇《又，吳海英》前晚播出第13集，收視錄得8.507%，雖然比上周收視跌咗少少，但無損劇集嘅受歡迎程度，前日全慧彬就喺Instagram上載與Eric及徐玄振嘅合照，又留言：「吻戲前偷拍，我都看到啦。」似乎呢場戲係拍Eric同徐玄振嘅咀嘴戲，點知又被全慧彬撞到。

另外，同柳俊烈合作出演《好運羅曼史》嘅黃靜茵，早前就為時裝雜誌《BAZAAR》拍攝封面，大騷弗爆身形。