恭喜羅渣士，有情人終成眷屬！些路迪領隊羅渣士過去一季領軍以聯賽不敗姿態成就本土「三冠王」，場內威到盡，場外一樣春風得意，44歲嘅佢周五同年輕10歲嘅莎樂（Charlotte Searle）喺蘇格蘭Loch Lomond高爾夫球場拉埋天窗，正式成為夫妻，並透過些路迪發佈婚紗照，可喜可賀。

羅渣士同莎樂喺2013年撻着，當時一位係利物浦領隊，一位係紅軍統籌球隊作客旅程嘅職員，而且雙方各自有老公、老婆，令背妻偷食致離婚收場羅渣士淪為香港傳媒口中嘅「人渣士」，莎樂就慘做「小三」。不過，就好似近排俾網民鬧爆嘅大台節目一樣，男歡女愛呢啲嘢真係「關你家事」咩，見佢哋家陣咁恩愛，始終值得恭喜嘅。