林欣彤（Mag）日前被本報讀者Cecilia，透過「爆相爆片」分享佢喺元朗吉野家，發現Mag同組合「天堂鳥」成員歐鎮源（Tyrese）撐枱腳嘅相，但Mag同Tyrese都否認有私情，Mag今日現身牛頭角出席活動，繼續否認係「最強第三者」。

有備而來嘅Mag，對於被形容為「最強第三者」，同已有華姐冠軍女友余思霆嘅Tyrese發展，笑住話：「如果話我係最強，我想話我係最強三部曲囉！」佢仲不忘宣傳自己嘅歌，話佢自己今年出咗3首新歌，就好似連續劇咁，又話頭兩首歌嘅點擊率已經過咗100萬，最尾嗰首就要跑數，叫大家多多支持，仲話如果達標就請食飯。之後，佢仲話可能係佢最近新歌《忍》係講第三者，MV又拍得靚，大家睇得太投入。

問佢會唔會因為傳聞而減少同Tyrese見面？Mag就話冇諗過：「唔想因為傳聞影響咗做朋友，大家睇娛樂新聞之餘，都聽吓歌啦！」怕唔怕影響人哋同女友感情？Mag就話唔評論人哋嘅嘢，又話唔本身唔識余思霆，只係大家用埋同一個健身教練。講到拍拖係咪會先查清楚對方係咪單身，佢即刻話：「梗係啦！」

精選娛聞，喺晒《娛果》
http://fb.com/appledailyent